“El più visitàdo al mondo!”...

È rivà un novo progeto
par la casa de Giulieta,
e par anca che, stavolta,
un po’ de ciucio i ghe le meta.
Ma, par la voja de contàr
la gran niova gossa a gossa,
el giornàl imboressàdo
el ghe n’ha sbarà una grossa!,
e, correndo ’nca ’l pericolo
de no essar proprio a piombo,
l’ha sentensià: sto sito
l’è ’l più visitàdo al mondo!
Proprio al mondo? L’è na bala!
... come se tanti miliardi
de visitator, turisti,
de curiosi e tiratardi,
davanti a le Piramidi
incolonà come convien,
o al Luvr o in Piassa Rossa,
al Colosseo, al Big Ben,
a l’aurora boreale,
a Parì, la tore Eiffèl,
al Bronzo de Riace
anca sensa so fradèl,
dei più gran capolavori
ammirando le belesse,
ghe disesse ai altri in fila:
“Mah... i è solo picolesse!
Volìo metar quel trionfo,
quela sinfonia del bello
che gh’è là in quel cortileto
sconto dentro in via Cappello?”
El progetto ora ’l prevede
un percorso museale,
che mescolarà a la storia
un bel carico de bale...
e te paghi otto e sinquanta,
disisette co la sposa...
Se non altro, a dirla tuta,
i farà vedar qualcosa!...
Ma chi è solo interessàdo
a vardàr quel cortileto,
g’avarà na ridussion
consistente sul bilieto!
E ’l poarà vardarse intorno
là in do’ è nato sto tramàcio,
in mezo a ciunghe spussolenti
tacà via con el spuàcio...
e gustarse el privilegio
de na statua caressàr,
freda, lustra, ’nca ingiassàda,
circondàda dal luamàr...
e po’ incòrzarse pian pian,
fin che ’l cor fa quatro sbalsi,
che l’ha speso un par de euri
par vardàr dei muri falsi!
.... ché in effeti lì un primato
gh’è sul serio a tutto tondo:
l’è el primato pa ’l turista
che ’l più semo l’è del mondo!