Bon Nadàl
Parole, pensieri, a ruota libera dell'istrione Roberto Puliero
Bon Nadàl a quei che crede
che ’l Nadàl sia luminarie,
e regài, e saldi, e sconti,
e occasioni e spese varie...
Bon Nadàl a tutti quei
che in Bra s’ha precipità,
e i è restà in mezo a la gente
tutto el giorno impilonà...
Bon Nadàl a sta Verona
tutta quanta illuminà,
che no bada più se ’l smog
el n’ha tutti invelenà...
Bon Nadàl a cì comanda
e guida l’Amministrassion,
e fra promesse e gran proclami
el fa ancora confusion...
Bon Nadàl a quei giornài
che, par far la so fortuna,
po’ i ne sconde le notissie
e ’l butìn i volta in cuna!
Bon Nadàl anca ’l Verona,
così tristo, ormai sicuro
che qua co sta dirigensa
no g’avemo più ’n futuro...
Bon Nadàl a cì sperava
rènte a quela mangiatoia
de rivàr, ma po’, rivàdi,
i è restàdi co la voja
parché subito i s’ha incorto
che in do’ i era rivà lori
l’èra za tutta intasàda,
tutta piena de assessori!
Bon Nadàl a quei pitochi
ch’è rivàdi su ’n barcon,
che da qua i è stà cassàdi
via de bruto, a ropeton...
proprio come era successo
a la Madona e San Giusepe,
quando disparà i sercava
un postesìn par el Presepe.
Bon Nadàl a cì ha scordàdo
che i più arente a la capana
i era proprio i poricani,
i disparà povari in cana.
Bon Nadàl a tutti quei
che ancor vùda i g’ha la pansa,
ma ha scoperto in quela grota
una luce de speransa!...
